ដោយ: គង់ លាងហួរ
អន្តរជាតិ: ទំហំពាណិជ្ជកម្មរវាងកម្ពុជា និងឥណ្ឌូនេស៊ីបានកើនឡើង៤៣,២ ភាគរយដល់៣០៤លានដុល្លារ ក្នុងត្រីមាសទីមួយនៃឆ្នាំនេះ។ នេះបើយោងតាមរបាយការណ៍របស់អគ្គនាយកដ្ឋានគយ និងរដ្ឋាករចេញផ្សាយនាពេលថ្មីៗនេះ។
ទំហំពាណិជ្ជកម្មនេះ ទើបតែទទួលបានការជំរុញ បន្ទាប់ពីក្រុមហ៊ុនអាកាសចរណ៍ឥណ្ឌូនេស៊ីAirAsia បានចាប់ផ្តើមប្រតិបត្តិការជើងហោះហើរត្រង់រវាងប្រទេសទាំងពីរ។ ក្រៅពីពាណិជ្ជកម្ម ការហោះហើរត្រង់ ក៏អាចលើកកំពស់វិស័យទេសចរណ៍ ការវិនិយោគ និងសកម្មភាពសេដ្ឋកិច្ចផ្សេងៗទៀតផងដែរ។
ទំហំពាណិជ្ជកម្មរវាងប្រទេសទាំងពីរ បានកើនឡើងក្នុងអំឡុងត្រីមាសទីមួយនៃឆ្នាំនេះ បើធៀបនឹងរយៈពេលដូចគ្នាកាលពីឆ្នាំមុន ។ របាយការណ៍នោះបានអះអាងថា ចាប់ពីខែមករាដល់ខែមីនា ឆ្នាំ២០២៣ កម្ពុជាបាននាំចេញទំនិញដែលមានតម្លៃ ១២លានដុល្លារទៅកាន់ប្រទេសសេដ្ឋកិច្ចធំជាងគេ របស់អាស៊ានមួយនេះ ដែលកើនឡើង៧៤ភាគរយ ធៀបនឹងរយៈពេលដូចគ្នាកាលពីឆ្នាំមុន។
ទន្ទឹមនឹងនេះ ការនាំចូលរបស់កម្ពុជា ពីប្រទេសឥណ្ឌូនេស៊ី បានកើនឡើង៤២ភាគរយ រហូតដល់២៩២លានដុល្លារអាមេរិក។
កម្ពុជា និងឥណ្ឌូនេស៊ី ក៏បានពិភាក្សាអំពីកិច្ចសហប្រតិបត្តិការបន្ថែមទៀតលើវិស័យពាណិជ្ជកម្ម ការវិនិយោគ និងទេសចរណ៍ តាមរយៈការជំរុញការនាំចេញកសិផលកម្ពុជា ទៅកាន់ទីផ្សារឥណ្ឌូនេស៊ីផងដែរ។
ក្រុមហ៊ុនអាកាសចរណ៍ឥណ្ឌូនេស៊ី AirAsia បានបើកដំណើរការជើងហោះហើរត្រង់ ពីទីក្រុងហ្សាកាតា មកកាន់ទីក្រុងភ្នំពេញជាផ្លូវការ នៅថ្ងៃទី១០ ខែមេសា។
ជាមួយនឹងការហោះហើរត្រង់ គេសង្ឃឹមថា ចំនួនភ្ញៀវទេសចរនឹងបន្តកើនឡើង។
លោកឧកញ៉ា លឹម ហេង អនុប្រធានសភាពាណិជ្ជកម្មកម្ពុជាបានមានប្រសាសន៍ថា ប្រទេសទាំងពីរមានសក្តានុពលខ្លាំង ក្នុងការអភិវឌ្ឍន៍វិស័យទេសចរណ៍បន្ថែមទៀត។
លោកបានបន្តទៀតថា “ការហោះហើរត្រង់នឹងដើរតួយ៉ាងសំខាន់ក្នុងការទាក់ទាញភ្ញៀវទេសចរ និងសម្រួលដល់ការធ្វើដំណើររបស់ពាណិជ្ជករ និងអ្នកវិនិយោគមកកាន់ប្រទេសកម្ពុជា”។
នៅក្នុងកិច្ចប្រជុំជាមួយមន្ត្រីជាន់ខ្ពស់ របស់ប្រទេសឥណ្ឌូនេស៊ីកាលពីខែមីនា រដ្ឋមន្ត្រីក្រសួងពាណិជ្ជកម្មកម្ពុជា លោក ប៉ាន សូរស័ក្តិ ធ្លាប់បានជំរុញឱ្យភាគីឥណ្ឌូនេស៊ី នាំចូលផលិតផលកសិកម្មពីកម្ពុជា ដូចជាអង្ករ ដំឡូងមី ស្វាយចន្ទី និងស្វាយ។
លោកក៏បានជំរុញឱ្យវិនិយោគិនឥណ្ឌូនេស៊ី ពិចារណាលើការវិនិយោគលើវិស័យកសិកម្ម ដូចជា ការបង្កើតម៉ាស៊ីនកិនស្រូវ ការកែច្នៃដំឡូងមីទៅជាផលិតផលឱសថ និងការវេចខ្ចប់សម្រាប់ប្រើប្រាស់ក្នុងស្រុក និងការនាំចូលផ្លែស្វាយ និងផ្លែឈើផ្សេងៗជាដើម។
ភាគីឥណ្ឌូណេស៊ីបានកត់សម្គាល់ថា កម្ពុជាបានអភិវឌ្ឍសេដ្ឋកិច្ចយ៉ាងរឹងមាំ និងមានភាពធន់ និងបានបង្ហាញពីចេតនាក្នុងការពង្រឹងកិច្ចសហប្រតិបត្តិការជាមួយកម្ពុជា ដើម្បីជំរុញពាណិជ្ជកម្មទ្វេរភាគី ការវិនិយោគ និងទេសចរណ៍៕
