ដោយ: គង់ លាងហួរ
ហុងកុង: ក្រុមហ៊ុនអចលនទ្រព្យធំជាងគេទី២នៅប្រទេសចិនតាមរយៈការលក់ China Vanke បានទាញផលពីការកើនឡើងនៃទីផ្សារក្នុងទីក្រុងហុងកុងក្នុងរយៈពេល៤ខែចុងក្រោយនេះ ដើម្បីប្រមូលដើមទុនថ្មីៗពីអ្នកវិនិយោគខាងក្រៅដើម្បីបន្ធូរបន្ថយវិបត្តិសាច់ប្រាក់ និងកាត់បន្ថយបំណុល។
ក្រុមហ៊ុននេះប្រមូលប្រាក់បាន៣,១៩៥ពាន់លានដុល្លារហុងកុង (៤៩៩លានដុល្លារអាមេរិក) ពីការលក់ភាគហ៊ុនថ្មី ដែលបានចុះបញ្ជីនៅហុងកុងចំនួន៣០០លាននៅតម្លៃ១៣,០៥ដុល្លារហុងកុង។
ភាគហ៊ុនដែលដាក់លក់នេះស្មើនឹង១៣,១ភាគរយនៃភាគហ៊ុនសរុប ដែលបានចុះបញ្ជីនៅហុងកុង ហើយវាត្រូវបានដាក់លក់បញ្ចុះតម្លៃ៦,១ភាគរយទៅកាន់ទីផ្សារ។
ក្រុមហ៊ុន China Vanke គ្រោងប្រើប្រាស់៦០ភាគរយនៃប្រាក់ចំណូលទាំងនេះដើម្បីសងប្រាក់កម្ចីនៅក្រៅប្រទេសរបស់ខ្លួន និងសមតុល្យដើម្បីបំពេញដើមទុនបង្វិលរបស់ក្រុមហ៊ុន។
ប្រហែល២៣ភាគរយនៃបំណុលដែលមានការប្រាក់របស់ក្រុមហ៊ុនចំនួន២៨០ពាន់លានយ័ន(៤០,៧ពាន់លានដុល្លារ) នៅចុងខែមិថុនា ឆ្នាំ២០២២ ត្រូវបានចាត់ជារូបិយប័ណ្ណបរទេស ។នេះបើយោងតាមរបាយការណ៍បណ្តោះអាសន្នរបស់ក្រុមហ៊ុន។
ក្រុមហ៊ុនបានឱ្យដឹងនៅក្នុងឯកសារនោះថា “ក្រុមហ៊ុនយល់ថា ប្រាក់ចំណូលនឹងមិនត្រូវបានប្រើសម្រាប់គម្រោងអភិវឌ្ឍន៍លំនៅដ្ឋានក្នុងស្រុកថ្មីនោះទេ”។
ផ្សារហ៊ុនរបស់ក្រុមហ៊ុន China Vanke បានដាំក្បាលចុះ៣,៩ភាគរយ មកនៅត្រឹម១៣,៥ដុល្លារហុងកុង នៅទីក្រុងហុងកុង បន្ទាប់ពីមានការប្រកាសនេះ ដែលជាកម្រិតទាបបំផុតក្នុងរយៈពេលមួយខែ៕
