ដោយ: លាងហួរ
ប៉េកាំង: ប្រធានាធិបតីចិន លោក ស៊ី ជីន ពីង បានអំពាវនាវដល់ក្រុមថ្នាក់ដឹកនាំកំពូលឱ្យប្រកាន់ខ្ជាប់នូវការណែនាំរបស់បក្សកុម្មុយនិស្តចិន “គ្រប់កាលៈទេសៈទាំងអស់” ក្នុងសម័យប្រជុំការិយាល័យនយោបាយ រយៈពេល២ថ្ងៃ ដែលត្រូវបានបិទបញ្ចប់កាលពីថ្ងៃអង្គារកន្លងទៅថ្មីៗនេះ។
យោងតាមទីភ្នាក់ងារសារព័ត៌មានរដ្ឋចិន Xinhua បានរាយការណ៍ថា លោក ស៊ី ជីនពីង បានមានប្រសាសន៍ថា“នៅគ្រប់កាលៈទេសៈទាំងអស់ យើងគួរតែប្រកាន់ខ្ជាប់នូវខ្សែបន្ទាត់របស់បក្ស និងបង្កើតភាពស៊ីសង្វាក់គ្នានៅក្នុងបក្ស។
លោកបានបន្ថែមថា មន្ត្រីទាំងអស់ត្រូវតែប្រកាន់យក “ភាពស្មោះត្រង់” ជាដាច់ខាតចំពោះបក្ស និង “ស្រឡាញ់បក្ស” យ៉ាងពិតប្រាកដ និងមានការព្រួយបារម្ភចំពោះបក្សគ្រប់ពេលវេលា។
ការកត់សម្គាល់របស់លោក ស៊ី ជីនពីង ត្រូវបានធ្វើឡើង ក្នុងអំឡុងពេល“កិច្ចប្រជុំជីវិតប្រជាធិបតេយ្យ” ដែលត្រូវបានគេចាត់ទុកថាជាសម័យប្រជុំរិះគន់ខ្លួនឯងនៃការិយាល័យនយោបាយ ដែលមានសមាជិកចំនួន២៤រូប និងជាស្ថាប័នធ្វើសេចក្តីសម្រេចចិត្តរបស់គណបក្សផងដែរ។
សារពត៌មាន Xinhua បានបន្តថា នៅក្នុងសម័យប្រជុំសមាជិកនីមួយៗនៃការិយាល័យនយោបាយបានប្តូរវេនគ្នានិយាយ និងវាយតម្លៃការអនុលោមតាមច្បាប់របស់គណបក្សស្តីពីការលើកកម្ពស់“ភាពជាអ្នកដឹកនាំ និងនយោបាយស្អាតស្អំ”។
របាយការណ៍ដដែលបានបន្ថែមថា លោក ស៊ី ជីនពីង បានធ្វើអត្ថាធិប្បាយលើការលើកឡើងរបស់សមាជិកនីមួយៗ និងបានផ្តល់ការណែនាំច្បាស់លាស់ដល់ពួកគេ ដើម្បីអនុវត្តតាមផងដែរ៕