ដោយៈ សុខុម
សេអ៊ូល: រដ្ឋាភិបាលកូរ៉េខាងត្បូង បានប្រកាសថា ម្ចាស់ផ្ទះរហូតដល់ទៅ១,២លានយូនីត នឹងត្រូវបានតម្រូវឱ្យបង់ពន្ធពិសេសក្នុងឆ្នាំនេះ ហើយនេះជាវិធានការដាក់ពិន័យ លើអ្នកមានផ្ទះមួយដែលមាន “តម្លៃខ្ពស់” ឬ ផ្ទះច្រើន។
នេះជាលើកទី១ហើយ ដែលម្ចាស់ផ្ទះដល់ទៅជាង១លានយូនីត នឹងត្រូវបានតម្រូវឱ្យបង់ពន្ធពិសេស ដែលគេហៅថាពន្ធអចលនទ្រព្យគ្រប់ជ្រុងជ្រោយ ចាប់តាំងពន្ធគ្រប់ជ្រុងជ្រោយនេះ ត្រូវបានដាក់ចេញឱ្យអនុវត្តន៍ក្នុងឆ្នាំ២០០៥មក។
អគ្គនាយកដ្ឋានពន្ធដារ បានចាប់ផ្ដើមផ្ញើវិក្កយបត្រពន្ធ ដែលត្រូវបង់ទៅតាមផ្ទះនិមួយៗហើយកាលពីថ្ងៃច័ន្ទ ទី២១ ខែវិច្ឆិកា។
ដោយមានគោលបំណង ទប់ស្កាត់ការទិញដីផ្អឹបទុកចោល ដើម្បីលក់ចំណេញពេលដីឡើងថ្លៃ គោលនយោបាយទាក់ទង នឹងពន្ធអចលនទ្រព្យគ្រប់ជ្រុងជ្រោយនេះ ត្រូវបានកែសម្រួល ក្នុងរយៈពេលជាច្រើនឆ្នាំមកនេះ ស្របតាមការឡើងថ្លៃនៃលំនៅដ្ឋាន។
ផ្ទះមួយចំនួនធំ ក្នុងចំណោមម្ចាស់ផ្ទះ១,២លានយូនីត ខាងលើនេះគឺជាអ្នកមានប្រាក់ចំណូលមធ្យម ដែលមានផ្ទះតែមួយ ហើយពួកគេត្រូវបានតម្រូវឱ្យបង់ពន្ធពិសេសនេះ ខណៈតម្លៃផ្ទះហក់ឡើងកប់ពពក ដោយសារតែគោលនយោបាយអចលនទ្រព្យ របស់រដ្ឋាភិបាលបាលមុនរបស់អតីតប្រធានាធិបតី Moon Jae-in បានបរាជ័យធ្ងន់ធ្ងរ។
គោលនយោបាយចុងក្រោយបង្អស់នេះ កំណត់យកពន្ធអចលនទ្រព្យគ្រប់ជ្រុងជ្រោយលើអ្នកមានផ្ទះ១ ដែលមានតម្លៃរហូត១,១ពាន់លានវ៉ុន (៨០៩.០០០ដុល្លារអាមេរិក) ឬច្រើនជាងនេះ ព្រមទាំងអ្នកមានផ្ទះច្រើនដែលមានតម្លៃបូកបញ្ចូលគ្នា លើសពី៦០០លានវ៉ុន (៤៤១.៧០០ដុល្លារអាមេរិក) ផងដែរ។
តម្លៃលំនៅដ្ឋាន បានធ្លាក់ចុះទូទាំងប្រទេសកូរ៉េខាងត្បូង កាលពីពេលថ្មីៗនេះ ដោយសារធនាគារកណ្ដាលប្រទេសនេះ ដំឡើងអត្រាការប្រាក់ខ្ពស់ពេក។
យោងតាមទិន្នន័យបង្ហាញថា ចំនួនអ្នកបង់ពន្ធដែលតម្រូវឱ្យបង់ពិសេសនៅឆ្នាំនេះ គឺកើនឡើង២៩%ធៀបនឹងឆ្នាំមុន។
តាមការរំពឹងទុក រដ្ឋាភិបាលកូរ៉េខាងត្បូង នឹងប្រមូលបានជាង៤ទ្រីលានវ៉ុន (ប្រមាណ៣ពាន់លានដុល្លារអាមេរិក) ពីពន្ធអចលនទ្រព្យគ្រប់ជ្រុងជ្រោយនៅឆ្នាំនេះ ដែលច្រើនជាងកាលពី៥ឆ្នាំមុនប្រមាណ១០ដង៕ Korea Times៕