ដោយ: លាងហួរ
វ៉ាស៊ីនតោន: ការិយាល័យជំរឿនសហរដ្ឋអាមេរិក បានរាយការណ៍កាលពីថ្ងៃពុធម្សិលមិញនេះថា ការសាងសង់ផ្ទះថ្មីនៅសហរដ្ឋអាមេរិកបានធ្លាក់ចុះនៅក្នុងខែកញ្ញា ចំពេលតម្រូវការបានធ្លាក់ចុះខ្លាំង។
ទិន្នន័យពីមុនបានបង្ហាញថា ការសាងសង់ផ្ទះថ្មីនៅសហរដ្ឋអាមេរិកបានស្ទុះងើបឡើងវិញក្នុងខែសីហា បន្ទាប់ពីធ្លាក់ចុះក្នុងខែកក្កដា។
យូនីតលំនៅដ្ឋានឯកជន ដែលត្រូវបានអនុញ្ញាតសាងសង់ ក្នុងខែកញ្ញាមានចំនួន១,៤ភាគរយ លើសពីអត្រាក្នុងខែសីហា បន្ទាប់ពីបានធ្លាក់ចុះ១០ភាគរយនៅក្នុងខែកញ្ញា។
យោងតាមសមាគមជាតិនៃអ្នកអចលនទ្រព្យ (NAR)បានឱ្យដឹងថា សន្ទស្សន៍ការលក់ផ្ទះ ដែលជាសូចនាករ នៃការលក់ផ្ទះបានធ្លាក់ចុះ២ភាគរយនៅក្នុងខែសីហា ដែលនិន្នាការនេះមានរយៈពេល៣ខែជាប់ៗគ្នា។
លោក Lawrence Yun ប្រធានសេដ្ឋវិទូ NAR បាននិយាយថាទិសដៅនៃអត្រាប្រាក់កម្ចីទិញផ្ទះ ធ្លាក់ចុះឬកើនឡើង គឺជាកត្តាជំរុញដ៏សំខាន់សម្រាប់ការទិញផ្ទះ ហើយអត្រាការប្រាក់ដ៏ខ្ពស់ នៅសហរដ្ឋអាមេរិកបានកាត់បន្ថយការចុះកិច្ចសន្យាទិញផ្ទះ។
លោកបន្តថា “ប្រសិនបើអត្រាប្រាក់កម្ចីទិញផ្ទះ មានកម្រិតមធ្យម ហើយសេដ្ឋកិច្ច នៅតែបន្តបន្ថែមការងារ នឹងធ្វើឲ្យការទិញផ្ទះក៏អាចមានស្ថិរភាពផងដែរ”។
លោក Yun រំពឹងថាសេដ្ឋកិច្ចនឹងនៅតែធ្លាក់ចុះ ពេញមួយរយៈពេលដែលនៅសល់នៃឆ្នាំនេះ ជាមួយនឹងអត្រាប្រាក់កម្ចីទិញផ្ទះ កើនឡើងដល់ជិត៧ភាគរយនៅក្នុងប៉ុន្មានខែខាងមុខនេះ។
លោក Yun បានបន្ថែមថា ប្រាក់កម្ចីទិញផ្ទះ អាចចាប់ផ្តើមមានស្ថិរភាព លុះត្រាណាអតិផរណាមានសភាពស្ងប់ស្ងាត់ ។
ការកើនឡើងយ៉ាងខ្លាំង នៃអត្រាប្រាក់កម្ចីទិញផ្ទះ បានកើតចេញមកពីសកម្មភាព របស់ធនាគារកណ្តាលសហរដ្ឋអាមេរិក បានដំឡើងអត្រាការប្រាក់ដ៏ខ្លាំងក្លា ដើម្បីធ្វើឱ្យអតិផរណាស្ថិតក្រោមការគ្រប់គ្រង៕