ដោយ៖ ម៉ាណេត
ភ្នំពេញៈ ឥណទានគេហដ្ឋាន គឺជាប្រភេទផលិតផលឥណទាន មានរយៈពេលវែង របស់ធនាគារណាមួយ ដែលបានបង្កើតឡើងដើម្បីផ្តល់ជូនសាធារណជន ដែលមានលក្ខណសម្បត្តិគ្រប់គ្រាន់ សម្រាប់ទិញគេហដ្ឋានដែលកំពុងតែសាងសង់ ឬសាងសង់រួច ធ្វើជាកម្មសិទ្ធផ្ទាល់ខ្លួន ឬក៏សម្រាប់យកទៅសាងសង់គេហដ្ឋាន លើដីកម្មសិទ្ធិដែលមានស្រាប់។
ទំហំឥណទាន រយៈពេលឥណទាន និងអត្រាការប្រាក់ ត្រូវបានកំណត់ដោយធនាគារនីមួយ។ ឥណទានគេហដ្ឋាន ត្រូវបានផ្តល់ជូនអតិថិជន មិនលើសពី៧០ភាគរយ នៃតម្លៃសរុបរបស់គេហដ្ឋានដែលត្រូវទិញ ឬសាងសង់គេហដ្ឋានលើដីកម្មសិទ្ធិ ដែលមានស្រាប់នោះឡើយ។
រយៈពេលខ្ចីអតិបរមា១០ឆ្នាំចំពោះ ៖
– អតិថិជនជាកម្មករ និយោជិត កំពុងបម្រើការងារក្នុងស្ថាប័នសាធារណៈ និងទីភ្នាក់ងារជាតិ-អន្តរជាតិ ដោយមិនត្រូវលើសពីអាយុចូលនិវត្តន៍ឡើយ។
– អតិថិជនផ្សេងទៀត ត្រូវមានកាយសម្បទារឹងមាំ និងមានអាយុ ចាប់ពីពេលទទួលប្រាក់កម្ចីរហូតដល់កាលាវសាន នៃរយៈពេលខ្ចីប្រាក់ មិនត្រូវលើសពីអាយុ៦០ឆ្នាំឡើយ។
អត្រាការប្រាក់ ចាប់ពី ១១% ដល់ ១៨% ក្នុងមួយឆ្នាំ ។
លក្ខណសម្បត្តិអតិថិជនដែលអាចទទួលឥណទានគេហដ្ឋាន
ជនកម្ពុជាគ្រប់រូបដែលជាពលរដ្ឋសកម្ម ឬជានីតិជន
មានប្រភពចំណូលច្បាស់លាស់ និងមាននិរន្តរភាព(មុខរបរអាជីវកម្ម ប្រាក់បៀវត្សរ៍ឬចំណូលផ្សេងៗទៀត)។
មានប្រវត្តិ កេរ្តិ៍ឈ្មោះ អត្តចរិតល្អ
មានទីលំនៅអចិន្ត្រៃយ៍ ដោយមានការបញ្ជាក់ដឹងឮពីអាជ្ញាធរ ក្នុងតំបន់ដែលលោកអ្នករស់នៅ។
មានឯកសារកំណត់អត្តសញ្ញាណ ៖ អត្តសញ្ញាណប័ណ្ណ ឬសៀវភៅគ្រួសារ ។ល៕
