ដោយ៖ ម៉ាណេត
ភ្នំពេញ៖ ក្រុមហ៊ុន Evergreen Assets Management ដែលមានមូលដ្ឋាននៅប្រទេសសឹង្ហបុរី កំពុងកៀគរប្រាក់ឱ្យបានចំនួន ៧៣ លានដុល្លារ (១០០ លានដុល្លារសឹង្ហបុរី) ក្នុងរយៈពេល ៥ ឆ្នាំ ដើម្បីផ្តល់ហិរញ្ញប្បទានដល់ការពង្រីកអាជីវកម្មរបស់ខ្លួននៅក្នុងកម្ពុជា សឹង្ហបុរី និងតំបន់ឥណ្ឌូចិន។ នេះបើយោងតាមការចុះផ្សាយរបស់សារព័ត៌មានអនឡាញ Deal Street Asia នៅថ្ងៃទី២៦ ខែសីហា ឆ្នាំ២០២០។
រហូតមកដល់ពេលនេះ ក្រុមហ៊ុន Evergreen ទទួលបានការដាក់ទុនវិនិយោគប្រមាណ ២៥ លានដុល្លារសឹង្ហបុរីពីវិនិយោគិន។ ក្រុមហ៊ុនបានឱ្យតំណែងលោកដាវីជេហ្គូ នៃក្រុមហ៊ុន Passion Venture Capital ក្នុងនាមជាអ្នកគ្រប់គ្រងមូលនិធិនេះ។
ដោយប្រើថវិកានេះ ក្រុមហ៊ុនគ្រោងនឹងចាប់ផ្តើមពង្រីកនៅកម្ពុជាតាមរយៈអាជីវកម្មមីក្រូហិរញ្ញវត្ថុ។ ក្នុងខែមីនាឆ្នាំនេះ ក្រុមហ៊ុនបានទទួលអាជ្ញាបណ្ណគ្រឹះស្ថានហិរញ្ញវត្ថុពីធនាគារជាតិនៃកម្ពុជា ដើម្បីអនុវត្តហិរញ្ញប្បទានមីក្រូ។
លោក David Yong នាយកប្រតិបត្តិក្រុមហ៊ុន បានថ្លែងថា ការទទួលអាជ្ញាបណ្ណនេះនឹងអាចឱ្យក្រុមហ៊ុន Evergreen ជួយដល់អាជីវកម្មខ្នាតជាច្រើន។
លោក បានបន្តថា “យើងសង្ឃឹមថា អាជីវកម្មហិរញ្ញវត្ថុមីក្រូរបស់យើង ក្រោមការគ្រប់គ្រងរបស់ក្រុមហ៊ុន នឹងចូលរួមចំណែកក្នុងការរីកចម្រើនរបស់កម្ពុជា ដែលកំពុងមានមត្រូវការហិរញ្ញប្បទាន ដើម្បីរក្សា សហគ្រាសធនតូច និងមធ្យម (SMEs) និងបុគ្គលអាជីវកម្មបន្តដំណើរការទៅមុខបន្ថែមទៀត”។
លោក បានឱ្យដឹងទៀតថា “ជាមួយគ្នានេះដែរ យើងក៏មានបំណងជួយដល់ស្ត្រីនៅកម្ពុជា ដែលជាធម្មតាមិនទទួលសូវពីធនាគារ ដើម្បីផ្តល់ឱ្យពួកគាត់ធ្វើអាជីវកម្មដោយខ្លួន”៕