ដោយៈ ម៉ាលីនណា
ភ្នំពេញៈ គម្រោងអភិវឌ្ឍន៍ផ្សារទំនើបសិនជូរីផ្លាហ្សា ស្ថិតនៅបណ្តោយមហាវិថីសហព័ន្ធរុស្ស៊ី បានបញ្ចប់ការសាងសង់គ្រោងអគាររួចរាល់ហើយ ដោយគ្រោងបើកដំណើរការមុនពិធីបុណ្យចូលឆ្នាំខ្មែរខាងមុខ។
គម្រោងអភិវឌ្ឍន៍ផ្សារទំនើបសិនជូរី ផ្លាហ្សា បានបើកការដ្ឋានសាងសង់កាលពីថ្ងៃទី ២៧ ខែវិច្ឆិកា ឆ្នាំ ២០១៩ លើទីតាំងចាស់នៃផ្សារសិនជូរីផ្លាហ្សា ដែលវិនិយោគដោយក្រុមហ៊ុន JLECC និងមានកម្ពស់ ៦ ជាន់។ ជាន់ផ្ទាល់ដី គ្រោងប្រើប្រាស់ជាកន្លែងលក់ត្រី សាច់ បន្លែ ផ្លែឈើ, ជាន់ទី ១ កន្លែងលក់ទំនិញទូទៅ (គ្រឿងឧបភោគ បរិភោគ សម្លៀកបំពាក់ គ្រឿងអលង្ការ), ជាន់ទី ២ ហាងប្រណីត កន្លែងថែរក្សាសុខភាព និងសម្ផស្ស, ជាន់ទី ៣ ភោជនីយដ្ឋាន ជាន់ទី ៤, ៥ និង ៦ ជាសណ្ឋាគារលំដាប់ផ្កាយ ៤ ព្រមទាំងមានសួនច្បារនៅខាងលើផងដែរ។
អភិបាលរងរាជធានីភ្នំពេញ លោកននួន ផារ័ត្នបានមានប្រសាសន៍ក្នុងពិធីប្រកាសបញ្ចប់ជាស្ថាពរការសាងសង់ផ្នែកគ្រឿងបង្គុំសំណង់ នៃគម្រោងសាងសង់អគារផ្សារទំនើបសិនជូរីផ្លាហ្សា កាលពីពេលថ្មីៗនេះថា នៅពេលបើកឱ្យដំណើរការផ្សារទំនើបសិនជូរីផ្លាហ្សា នឹងក្លាយជាមជ្ឈមណ្ឌលពាណិជ្ជកម្មថ្មីមួយទៀត ដែលជួយលើកស្ទួយកិត្យានុភាពរាជធានីភ្នំពេញ ពិសេសក្នុងឱកាសនៃកិច្ចប្រជុំធំៗ ដែលកម្ពុជាត្រូវធ្វើជាម្ចាស់ផ្ទះ ក៏ដូចជាការប្រកួតកីឡាប្រជាជាតិអាស៊ីអាគ្នេយ៍ឆ្នាំ ២០២៣ ខាងមុខផងដែរ។
ជាមួយគ្នានេះ អ្នកនាង គឹម គិនកេសា អ្នកគ្រប់គ្រងជាន់ខ្ពស់នៃក្រុមហ៊ុន CBRE Cambodia បានមានប្រសាសន៍ថា ចំណុចខ្លាំងរបស់ផ្សារទំនើបសិនជូរីផ្លាហ្សា គឺស្ថិតនៅទីតាំងមានមនុស្សរស់នៅច្រើន និងជិតព្រលានយន្តហោះអន្តរជាតិភ្នំពេញ ដែលជាកន្លែងមានការធ្វើដំណើរឆ្លងកាត់ច្រើន។ ដោយសារអគារផ្សារទំនើបនេះនឹងត្រូវប្រើប្រាស់ជាលក្ខណៈចម្រុះរាប់ចាប់តាំងពីកន្លែងលក់ម្ហូបអាហារ ហាងទំនើបៗ និងសណ្ឋាគារនោះ ដូច្នេះទីនោះនឹងអាចមានអតិថិជនច្រើនពេលបើកដំណើរការ។
អ្នកនាងបន្តថា “ជាមួយនឹងសក្តានុពលទីតាំង ខ្ញុំគិតថាផ្សារទំនើបនេះអាចនឹងឆាប់ទទួលជោគជ័យ”៕
