ដោយៈសិរីជេស៊ីកា
កែបៈ អភិបាលខេត្តកែប លោកសោម ពិសិដ្ឋបានមានប្រសាសន៍ឲ្យដឹងថា ការសាងសង់ស្ពានតភ្ជាប់រវាងក្រុងកែប ទៅកាន់កោះទន្សាយសម្រេចបាន៨០ភាគរយហើយ និងអាចប្រើប្រាស់បណ្តោះអាសន្ន។
លោកអភិបាលខេត្តបានមានប្រសាសន៍ ឲ្យដឹងតាមទូរស័ព្ទកាលពីរសៀលថ្ងៃទី១៥ វិច្ឆិកានេះថា ដំណើរការសាងសង់កំពង់ផែនេះ សម្រេចបានតាមការគ្រោងទុក ដែលអាចប្រើប្រាស់បណ្តើរៗបានហើយ ខណៈការងារជាច្រើនទៀតបាននិងកំពុងធ្វើ ក្នុងនាមអភិបាលខេត្ត ដែលជាការត្រៀមខ្លួនស្វាគមន៍ភ្ញៀវទេសចរណ៍ជាតិ អន្តរជាតិនាពេលខាងមុខនេះ។
លោកបន្តថា “ជាមួយគ្នានេះ ខេត្តបានចាក់ដីពង្រីកតំបន់លំហែរ នៅឆ្នេរសមុទ្រ ដើម្បីទទួលរៀបចំតំបន់កំសាន្តសាធារណៈក្នុងខេត្ត និងការកសាងហេដ្ឋារចនាសម្ព័ន្ឋជាច្រើនទៀតបាននិងកំពុងធ្វើ”។ លោកបន្តថា “កំពង់ផែកោះទន្សាយនឹងជាផ្នែកមួយទាក់ទាញទេសចរណ៍អន្តរជាតិ ជាមួយប្រទេសក្នុងតំបន់ ព្រោះកំពង់ផែនេះអាចទទួលការចតកប៉ាល់ទេសចរណ៍កម្រិតមធ្យមបានផងដែរ”។
លោកសោម ពិសិដ្ឋបានបន្តទៀតថា អាជ្ញាធរខេត្តក៏បាននិងកំពុងរៀបចំសួនច្បារ ផ្សាររាត្រី តំបន់កំសាន្តជាច្រើនទៀត ដើម្បីជម្រុញការលើកកំពស់សោភ័ណភាពខេត្តផង ទាក់ទាញទេសចរណ៍ផង និងទាក់ទាញការវិនិយោគពីអ្នកវិនិយោគជាតិ និងអន្តរជាតិផងដែរ៕
