ដោយៈសុខុម
មែលប៊ន: ក្រុមហ៊ុនជីករ៉ែអង់គ្លេស-អូស្រ្តាលី Rio Tinto ដែលធំបំផុតទី២ ក្នុងពិភពលោកបានប្រកាសកាលពីថ្ងៃពុធ ទី២០ តុលា នូវផែនការចំណាយដល់ទៅ៧.៥ពាន់លានដុល្លារអាមេរិក ដើម្បីកាត់បន្ថយការបំភាយឧស្ម័នកាបូន ឱ្យបាន៥០%នៅត្រឹមឆ្នាំ២០៣០ ដែលច្រើនជាង៣ដងបើធៀប នឹងគោលដៅដែលខ្លួនបានកំណត់មុននេះ។
ខណៈក្រុមហ៊ុនផលិតដែកនានា បន្តការជំរុញរបស់ខ្លួន ដើម្បីកាត់បន្ថយការបំភាយឧស្ម័នកាបូន ស្របតាមការប្តេជ្ញាចិត្តរបស់ពិភពលោក ក្នុងការកាត់បន្ថយការបំភាយកាបូនឱ្យមកនៅកម្រិតសូន្យ ត្រឹមឆ្នាំ២០៥០ ក្រុមហ៊ុន Rio Tinto ប្រកាសថា ខ្លួនបានព្យាយាមកាត់បន្ថយ ការបំភាយកាបូនវិសាលភាពទី១ (Scope 1) និងវិសាលភាពទី២ (Scope 2) របស់ខ្លួននៅត្រឹមដំណាច់ទសវត្សរ៍នេះ។
ការបំភាយឧស្ម័នកាបូនវិសាលភាពទី១ សំដៅដល់ការបំភាយដោយផ្ទាល់ពីសំណាក់ក្រុមហ៊ុន ហើយការភាយឧស្ម័នកាបូនវិសាលភាពទី២ សំដៅដល់ការបំភាយដោយប្រយោលក្នុងកម្រិតជាក់លាក់ណាមួយ។
លោក Jakob Stausholm នាយកប្រតិបត្តិក្រុមហ៊ុន Rio Tinto បានថ្លែងថា “វាជាការផ្លាស់ប្ដូរយ៉ាងធំ ប៉ុន្តែវាជាអនាគតសម្រាប់ក្រុមហ៊ុន Rio Tinto”។
ដើម្បីសម្រេចបានគោលដៅនេះ ក្រុមហ៊ុន Rio Tinto នឹងបង្កើនការប្រើប្រាស់ថាមពលកកើតឡើងវិញ បង្កើនការចំណាយលើការស្រាវជ្រាវ និងការអភិវឌ្ឍន៍ឆ្ពោះទៅរកមាគ៌ាកាត់បន្ថយ ការបំភាពឧស្ម័នកាបូនឱ្យមកនៅកម្រិតសូន្យ ហើយក៏បង្កើនការចំណាយទ្វេដង ដើម្បីជំរុញកំណើនរ៉ែដែលមានសារៈសំខាន់ ចំពោះការផ្លាស់ប្តូរថាមពល ឱ្យឈានដល់ ប្រមាណ៣ពាន់លានដុល្លារអាមេរិក ក្នុងមួយឆ្នាំចាប់ពីឆ្នាំ២០២៣ ទៅផងដែរ។
ក្រុមហ៊ុន Rio Tinto បានបង្កើនផែនការចំណាយមូលធនរបស់ខ្លួន សម្រាប់ឆ្នាំ២០២២ ពី៧,៥ពាន់លានដុល្លារអាមេរិក ដល់៨ពាន់លានដុល្លារអាមេរិក ហើយនិយាយថា ខ្លួនរំពឹងថានឹងចំណាយ៩ពាន់លានដុល្លារអាមេរិក សម្រាប់ឆ្នាំ២០២៣ និង១០ពាន់លានដុល្លារអាមេរិក សម្រាប់ឆ្នាំ២០២៤។
លោក Jakob Stausholm បានគូសបញ្ជាក់ថា ទន្ទឹមនេះក្រុមហ៊ុនរបស់លោកកំពុងចាត់វិធានការមួយចំនួនទៀត ដើម្បីជួយអតិថិជនកាត់បន្ថយការ បំភាយឧស្ម័នរបស់ពួកគេផងដែរ៕ The Edge Markets៕
