ភាគហ៊ុនអាស៊ីហក់ឡើង ខណៈការបារម្ភអំពីសំពាធអតិផរណាថមថយ

ដោយៈសុខុម
ហុងកុង:  ភាគហ៊ុនអាស៊ី បានហក់ឡើងនៅថ្ងៃអង្គារ ទី២៥ ឧសភាម្សិលម៉ិញនេះ នៅពេលការព្រួយបារម្ភ អំពីអតិផរណាបានថមថយទៅវិញ ខណៈតម្លៃរូបិយប័ណ្ណដុល្លារអាមេរិក បានធ្លាក់ចុះទាប៤ខែជាប់គ្នា។ នេះយោងតាមការចុះផ្សាយរបស់សារព័ត៌មាន The Edge Markets។

ការហក់ឡើងនេះកើតមានឡើង ក្រោយពីក្រុមមន្ត្រីធនាគារកណ្តាលរបស់សហរដ្ឋអាមេរិក Federal Reserve បាននិយាយសម្រាលការព្រួយបារម្ភ អំពីការរឹតបន្តឹងគោលនយោបាយរូបិយវត្ថុ។

 

នៅក្នុងការជួញដូរកាលពីពេលព្រឹកនៅអឺរ៉ុប ផ្សារភាគហ៊ុន Euro Stoxx 50 បានហក់ឡើង០,២៧% ខណៈផ្សារភាគហ៊ុនអាល្លឺម៉ង់ DAX បានហក់ឡើង០,១៤% ហើយផ្សារភាគហ៊ុនអង់គ្លេស FTSE បានហក់ឡើង០,២១%។ ទន្ទឹមនេះ ផ្សារភាគហ៊ុនសហរដ្ឋអាមេរិក S&P 500 បានហក់ឡើង០,២៧%។

ចុចទីនេះដើម្បី Subscribe Telegram Channel «Cambodia Financial Times» សម្រាប់ទទួលបានព័ត៌មានថ្មីៗ

នៅអាស៊ីMSCI ដែលជាសន្ទស្សន៍ផ្សារភាគហ៊ុន ធំបំផុតរបស់អាស៊ី-ប៉ាស៊ីហ្វិក ក្រៅពីប្រទេសជប៉ុន បានហក់ឡើង១,៣%ក្នុងកម្រិតខ្ពស់ ក្នុងរយៈពេល២សប្តាហ៍ បន្ទាប់ពីភាគហ៊ុនអាមេរិក បានហក់ឡើងតិចតួចនៅក្នុងវគ្គជួញដូរលើកមុន។

ផ្សារភាគហ៊ុនអូស្រ្តាលី បានហក់ឡើង០,៨១%ដល់កម្រិតខ្ពស់ ក្នុងរយៈពេល២សប្តាហ៍។ ចំណែកឯសន្ទស្សន៍ផ្សារភាគហ៊ុនជប៉ុន Nikkei បានហក់ឡើង០,៦% ដែលជំរុញដោយភាគហ៊ុនបច្ចេកវិទ្យាក្នុងស្រុក ទោះបីជាការហក់ឡើងនោះលាយឡំ ដោយក្ដីបារម្ភអំពីសេដ្ឋកិច្ចងើបឡើងយឺត ដោយសារការចាក់វ៉ាក់សាំងយឺតនៅក្នុងប្រទេសនេះក្ដី។

អ្វីដែលគួរឱ្យភ្ញាក់ផ្អើល ផ្សារភាគហ៊ុនចិនCSI300 បានហក់ឡើងរហូតដល់២,៥៨ភាគរយ ខណៈសន្ទស្សន៍ផ្សារភាគហ៊ុនក្រុងសៀងហៃ Shanghai Composite Index បានហក់ឡើង២,០៣%ដល់កម្រិតខ្ពស់បំផុតចាប់តាំងពីដើមខែមីនា។ ហើយសន្ទស្សន៍ផ្សារភាគហ៊ុនក្រុងហុងកុង Hang Seng បានហក់ឡើង១,៤៣% ។

កាលពីថ្ងៃច័ន្ទ ទី២៤ ឧសភា សង្កាត់ផ្សារភាគហ៊ុនដ៏ល្បីល្បាញ Wall Street នៅសហរដ្ឋអាមេរិក បានហក់ឡើងខ្ពស់ជាពិសេសភាគហ៊ុនបច្ចេកវិទ្យា ដោយភាគហ៊ុនរបស់ក្រុមហ៊ុនApple បានហក់ឡើង១,៣៣% និងភាគហ៊ុនក្រុមហ៊ុន Microsoft បានហក់ឡើង២,២៩%។

ផ្សារភាគហ៊ុនអាមេរិក Dow Jones Industrial Average បានហក់ឡើង០.៥៤% ខណៈពេលផ្សារភាគហ៊ុន S&P 500 បានហក់ឡើង០,៩៩% ហើយផ្សារភាគហ៊ុន Nasdaq Composite បានហក់ឡើង១,៤១%៕

LEAVE A REPLY

Please enter your comment!
Please enter your name here