ឧកញ៉ាគួច ម៉េងលីៈសូមកុំជឿអ្នកនិយាយថាគ្មានដើមទុនតែរកស៊ីជោគជ័យ

ដោយៈលក្ខិណា
ភ្នំពេញៈ លោកឧកញ៉ាគួច ម៉េងលី អគ្គនាយកនៃក្រុមហ៊ុនម៉េងលី ជេគួច និងជាអ្នកដែលតែងតែចែករំលែកនូវចំណេះដឹង និងបទពិសោធន៍ការធ្វើអាជីវកម្មបាននិយាយថា លោកពិតជាខ្នាញ់ ចំពោះអ្នកដែលនិយាយធ្វើអាជីវកម្ម ឬជំនួញដោយមិនប្រើដើមទុន ហើយពិតជាឆ្ងល់ថា តើគេធ្វើជំនួញរបៀបម៉េចបើគ្មានដើមទុននោះ។

លោកឧកញ៉ាមានប្រសាសន៍បន្តថា ជាធម្មតានៅលើលោកនេះ បើគ្មានប្រាក់ទេ នោះយើងមិនអាចធ្វើអ្វីបានឡើយ ប៉ុន្តែចំពោះការធ្វើអាជីវកម្ម ពេលខ្លះយើងអាចដំណើរការបាន ដោយមិនចាំបាច់ប្រើប្រាស់ថវិកាផ្ទាល់ខ្លួនគ្រប់ចំនួនក៏បានដែរ ដោយយកប្រាក់កម្ចីពីធនាគារ ឬមីក្រូហិរញ្ញវត្ថុ។ ដើម្បីអាចយកប្រាក់កម្ចីពីធនាគារ មកបើកអាជីវកម្មបាន គេត្រូវតែមានទី១ គម្រោងអាជីវកម្ម (Business Plan)ទៅបង្ហាញគេ ហើយត្រូវបរិយា​យលម្អិត Business Plan នេះ ត្រូវចំណាយប៉ុនណា? ឬប៉ុន្មាន? មានទីតាំងនៅតំបន់ណា? មានអតិថិជនពេញនិយមច្រើនទេ? អាជីវកម្មរបស់យើង មានគុណភាពស្តង់ដារកម្រិតណា? អាចរកចំណូលបានតាមស្ដង់ដារឬទេ? មានធ្វើសវនកម្មហើយឬនៅ? មានបញ្ជីត្រឹមត្រូវហើយឬនៅ? មានផែនការច្បាស់លាស់ឬទេ?

លោកឧកញ៉ាបន្ថែមថា “ដើម្បីបានប្រាក់មកប្រើប្រាស់ ក្នុងការបង្កើតអាជីវកម្ម គេត្រូវដាក់គម្រោងអាជីវកម្មឱ្យធនាគារមើល ឱ្យគេវាយតម្លៃ ព្រោះប្រសិនបើគេមើលឃើញថា យើងមានចំណូលសមរម្យអាចទទួលយកបាន មានគម្រោងច្បាស់លាស់ គឺគេឱ្យយើងខ្ចីភ្លាម ទោះបីការផ្តល់កម្ចីនេះ បានត្រឹមតែពី៦០% ទៅ៧០%ក្តី”។លោកបន្តថា  “មុនពេលអនុញ្ញាតឱ្យបុគ្គលណាម្នាក់ខ្ចីប្រាក់ ទំាងធនាគារ ឬក៏មីក្រូហិរញ្ញវត្ថុ គេតែងតែសិក្សាអំពីបុគ្គលនោះជាមុនសិន ទោះជាបុគ្គលនះមានប្លង់ឱ្យគេរួចហើយក៏ដោយ ព្រោះគេចង់ដឹងថា តើបុគ្គលនោះយកប្រាក់ទៅធ្វើ ដោយបារម្ភខ្លាចអតិថិជនយកថវិកាទៅប្រើខុសគោលដៅ”។

ចុចទីនេះដើម្បី Subscribe Telegram Channel «Cambodia Financial Times» សម្រាប់ទទួលបានព័ត៌មានថ្មីៗ

ជាទូទៅគេសង្កេតឃើញមានអ្នកមួយចំនួន ដែលតាំងខ្លួនជាគ្រូជោគជ័យក្នុងអាជីវកម្ម និងគ្រូបង្រៀនបង្កើតអាជីវកម្ម ដោយមិនប្រើដើមទុន តែងប្រកាសកៀងគរអ្នកចូលរួមវគ្គបង្កើតអាជីវកម្មដោយមិនប្រើទុន តែយ៉ាងណាក៏មានអ្នកចូលរៀន ក្នុងវគ្គសិក្សានេះជាច្រើនផងដែរ។ ទោះជាបែបនេះក្ដី ក៏មានករណីសមត្ថកិច្ចចាប់ខ្លួនម្ចាស់ក្រុមហ៊ុន ឬបុគ្គលមួយចំនួន ដែលកៀងគរថវិកាមកវិនិយោគដោយចោទប្រកាន់ពីបទឆបោក។

អ្នកជំនាញហិរញ្ញវត្ថុជាច្រើនក៏បានក្រើនរំលឹកពលរដ្ឋ សូមកុំចាញ់បោកជនឆបោក ដោយចង់ឆាប់មានឆាប់បានដោយមិនខិតខំពេក ព្រោះវាអាចនាំឱ្យបាត់បង់ថវិកានិងពេលវេលាផងដែរ៕

LEAVE A REPLY

Please enter your comment!
Please enter your name here