ដោយៈគង់ ម៉ាលីន
ភ្នំពេញៈ វិនិយោគិនរបស់ប្រទេសថៃដែលមានព្រំដែនជាប់កម្ពុជា បានជាប់លេខរៀងទី៩ ក្នុងចំណោមវិនិយោគិនបរទេស ដែលបាននិងកំពុងវិនិយោគនៅកម្ពុជា។
ឯកអគ្គរាជទូតរបស់កម្ពុជាប្រចាំនៅទីក្រុងបាងកក ប្រទេសថៃលោក អ៊ូក សោភ័ណ្ឌបានឱ្យដឹងនៅក្នុងពិធីដាក់ឱ្យដំណើរការមជ្ឈមណ្ឌលពាណិជ្ជកម្មកម្ពុជានៅប្រទេសថៃ(CBC) កាលពីពេលថ្មីៗនេះថា ដើម្បីផ្សព្វផ្សាយការទូត សេដ្ឋកិច្ច លើកកម្ពស់ពាណិជ្ជកម្មអន្តរជាតិ និងទាក់ទាញក្រុមវិនិយោគិនបរទេសមកកាន់កម្ពុជា កាន់តែច្រើនបន្ថែមទៀត ការបើកដំណើរការCBC នឹងដើរតួជាស្ពានយ៉ាងសំខាន់។
លោកបន្តថា “ប្រទេសថៃស្ថិតនៅក្នុងចំណោម ប្រទេសវិនិយោគិនធំជាងគេទី ៩ នៅក្នុងប្រទេសកម្ពុជា ដែលស្រូបយកប្រហែល១ពាន់លានដុល្លារ នៅចន្លោះឆ្នាំ ១៩៩៤ និងចុងត្រីមាសទី៣ ឆ្នាំ ២០១៧”។លោកបន្តថា “បច្ចុប្បន្នមានក្រុមហ៊ុនជាង១ ០០០ មកពីប្រទេសថៃ បានចុះបញ្ជីនៅក្រសួងពាណិជ្ជកម្មកម្ពុជា ក្នុងចំណោមក្រុមហ៊ុនទាំងនោះមានដូចជា BJC BigC Group of Companies, Siam Cement Group (SCG), Charoen Porkphand Group និងក្រុមហ៊ុនប្រតិបត្តិករ CP All Public Company ដែលគ្រោងនឹងបើកហាងលក់ 7-Eleven នៅក្នុងប្រទេសកម្ពុជា”។
ទំហំពាណិជ្ជកម្មកម្ពុជា-ថៃ កាលពីអំឡុងត្រីមាសទី១ ឆ្នាំ២០២១ មានចំនួនសរុប២០៩៧,៣៤លានដុល្លារ ធ្លាក់ចុះ២១,៣៦ភាគរយធៀបនឹងរយៈពេលដូចគ្នាឆ្នាំ ២០២០។ ក្នុងនោះការនាំពីកម្ពុជាទៅថៃ មានទំហំទឹកប្រាក់៣២៩,៥៤លានដុល្លារ ធ្លាក់ ៤៨,៩២ ភាគរយ ខណៈការនាំទំនិញពីប្រទេសថៃមកកម្ពុជាមានតម្លៃ១៧៦៧,៨ លានដុល្លារ ធ្លាក់ ១២,៥៧ភាគរយ។ នេះបើតាមទិន្នន័យរបស់នាយកដ្ឋានពាណិជ្ជកម្មបរទេសនៃប្រទេសថៃ៕