ដោយៈសុខុម
ចិន: ក្រុមអ្នកជំនាញ និងថ្នាក់ដឹកនាំអាជីវកម្ម បានលើកឡើងកាលពីថ្ងៃច័ន្ទ ទី១៩ មេសាថា កិច្ចព្រមព្រៀងពាណិជ្ជកម្ម “ភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់” (RCEP) ដែលត្រូវបានចុះហត្ថលេខាកាលពីឆ្នាំមុន នឹងធ្វើឱ្យតំបន់អាស៊ី-ប៉ាស៊ីហ្វិក កាន់តែមានទឹកមាត់ប្រៃ នៅក្នុងទិដ្ឋភាពសេដ្ឋកិច្ចពិភពលោក។
កិច្ចព្រមព្រៀងនេះនឹងជួយបង្កើនស្តង់ដារពាណិជ្ជកម្ម និងការវិនិយោគដើម្បីជំរុញកំណើនសេដ្ឋកិច្ចទូទាំងពិភពលោក។ នេះបើយោងតាមគេហទំព័រ Ecns.cn ចុះផ្សាយនៅថ្ងៃទី២០ មេសា នេះ។
លោក Long Yongtu អតីតអនុរដ្ឋមន្រ្តីពាណិជ្ជកម្មបរទេស និងជាអតីតអគ្គលេខាធិកានៃវេទិកាអាស៊ីក្រុងប៉អៅ (Boao Forum for Asia) ថ្លែងថា ក្នុងនាមជាកិច្ចព្រមព្រៀងពាណិជ្ជកម្មដ៏ធំមួយ ដើម្បីការពារក៏ដូចជា ជំរុញសកលភាវូបនីយកម្មបន្ថែមទៀត កិច្ចព្រមព្រៀង RCEP ពិតជាមានសារៈសំខាន់ណាស់ សម្រាប់ក្របខណ្ឌពាណិជ្ជកម្មពហុភាគី និងផ្តល់កម្លាំងជំរុញបន្ថែមដល់សកលភាវូបនីយកម្ម។
អំឡុងសន្និសីទប្រចាំ២០២១ ក្នុងវេទិកាអាស៊ីក្រុងប៉អៅ លោកLong Yongtu បានលើកឡើងថា តំបន់អាស៊ី-ប៉ាស៊ីហ្វិក កាន់តែមានទឹកមាត់ប្រៃ ក្នុងនាមជាមហាអំណាចសេដ្ឋកិច្ចមួយនៅប៉ុន្មានឆ្នាំចុងក្រោយនេះ ហើយជាមួយនឹងការចុះកិច្ចព្រមព្រៀងពាណិជ្ជកម្មសេរី RCEP អន្តរកាលនេះហាក់បង្ហាញកាន់តែច្បាស់។
ជាមួយគ្នានេះ លោក Denis Depoux នាយកគ្រប់គ្រងទូទាំងពិភពលោកនៅក្រុមហ៊ុនពិគ្រោះយោបល់អន្តរជាតិ Roland Berger បានបញ្ចេញទស្សនៈដូច្នេះថា “កិច្ចព្រមព្រៀង RCEP បង្កើតបានវេទិកាមួយ ដើម្បីគ្រប់គ្រងទំនាក់ទំនងសេដ្ឋកិច្ច រវាងបណ្តាប្រទេសជាសមាជិក នៅក្នុងតំបន់អាស៊ី-ប៉ាស៊ីហ្វិក។ នេះជាសញ្ញាបង្ហាញទៅដល់ពិភពលោកថា តំបន់នេះត្រូវតែពង្រឹងសមត្ថភាពរបស់ខ្លួន ក្នុងនាមជាតំបន់សមាហរ័ណកម្ម”។
លោកបានបន្ថែមថា កិច្ចព្រមព្រៀង RCEP កំពុងបង្កើតក្របខណ្ឌសម្រាប់សមាហរណកម្មតំបន់បន្ថែមទៀត និងការបែងចែកកម្លាំងពលកម្មថ្មី រវាងបណ្ដាប្រទេសនៅអាស៊ី ដែលនឹងជួយសម្រួលដល់ពាណិជ្ជកម្ម និងការវិនិយោគសម្រាប់បណ្ដាប្រទេសជាសមាជិក ព្រមទាំងជំរុញកំណើនសេដ្ឋកិច្ចក្នុងតំបន់។
លោកគូសបញ្ជាក់ថា “ការបន្ទាបអត្រាពន្ធរវាងប្រទេសមួយចំនួន ក្នុងចំណោមប្រទេសទាំងនេះ ក៏កំពុងបង្កើតឱកាសសម្រាប់កំណើនក្នុងតំបន់នេះផងដែរ”។
ចំណែកលោក Michael Lai នាយកគ្រប់គ្រងទូទៅនៃក្រុមហ៊ុនផលិតវ៉ាក់សាំង AstraZeneca China លើកឡើងថា កិច្ចព្រមព្រៀងRCEP នឹងជួយធ្វើឱ្យសកម្មភាពពាណិជ្ជកម្មបរទេសក្នុងប្រទេសចិន និងសកម្មភាពវិនិយោគផ្ទាល់ ពីបរទេសនៅក្នុងបណ្ដាប្រទេសដៃគូកើនឡើងខ្លាំង។
អ្នកជំនាញជាច្រើនសុទ្ឋតែមានសុទិដ្ឋិនិយមអំពីកិច្ចព្រមព្រៀង ដើម្បីបង្កើតតំបន់ពាណិជ្ជកម្មដ៏ធំនេះផងដែរ។
លោក Jean-Etienne Gourgues នាយកគ្រប់គ្រងក្រុមហ៊ុនផលិតស្រា Pernod Ricard China បានលើកឡើងថា សម្រាប់ក្រុមហ៊ុនសហគ្រាសមកពីក្រៅតំបន់ ការចុះកិច្ចព្រមព្រៀង RCEP នឹងផ្តល់បរិយាកាសធុរកិច្ចបើកទូលាយ និងអំណោយផល ព្រមទាំងនាំមកនូវគោលនយោបាយនានាដែលកាន់តែមានតម្លាភាព។
លោក Ding Yifan អ្នកស្រាវជ្រាវជាន់ខ្ពស់ នៅវិទ្យាស្ថានអភិវឌ្ឍន៍ពិភពលោក (Institute of World Development) នៃមជ្ឈមណ្ឌលស្រាវជ្រាវការអភិវឌ្ឍន៍នៃក្រុមប្រឹក្សារដ្ឋ (Development Research Center of the State Council) លើកឡើងថា ប្រទេសចិន ប្រហែលជាអាចជំរុញឱ្យមានការច្របាប់បញ្ចូលគ្នា នូវកិច្ចព្រមព្រៀង RCEP និងកិច្ចព្រមព្រៀងភាពជាដៃគូអន្តរប៉ាស៊ីហ្វិក ប្រកបដោយភាពគ្រប់ជ្រុងជ្រោយ និងវឌ្ឍនភាព (CPTPP) ព្រោះប្រទេសចិន បានពិចារណាចូលរួមជាមួយCPTPP ហើយបានពង្រឹងទំនាក់ទំនងជាមួយបណ្ដាប្រទេសជាសមាជិក។
លោកបានបន្ថែមថា “ទោះជាយ៉ាងណា ប្រទេសចិន នឹងត្រូវការពេលវេលាច្រើននៅក្នុងការចរចា ជាមួយបណ្តាប្រទេសជាសមាជិក ដើម្បីចូលរួមកិច្ចព្រមព្រៀង CPTPP នេះផងដែរ”៕