ដោយ៖ លក្ខិណា
ភ្នំពេញ ៖ បច្ចុប្បន្ននេះ មានបុគ្គលជាច្រើនបានចាប់ផ្ដើមជាមួយនឹងអាជីវកម្មរបស់ខ្លួន តែអ្វីដែលពិបាកសម្រាប់ម្ចាស់អាជីវកម្មក្នុងការចាប់ផ្ដើមនោះ គឺបុគ្គលិកបម្រើការឱ្យក្រុមហ៊ុនឬអាជីវកម្មរីកចម្រើន។
លោកប៊ុន ផាក គឺជាម្ចាស់អាជីវកម្មនិងជាអ្នកចាប់ផ្ដើមអាជីវកម្មមួយរូបបានបង្ហាញពីអារម្មណ៍ដែលខ្លួនចង់បាន គឺចង់បានបុគ្គលិកដែលមានការគិតដូចខ្លួនគិត ទើបបុគ្គលិកនោះ ធ្វើមិនបានលទ្ធផលដូចខ្លួនចង់បានក្ដី។
លោកប៊ុន ផាក ដែលជាបុគ្គលអ្នកចាប់ផ្ដើមអាជីវកម្មមួយរូបនៅកម្ពុជា និងជាអ្នកដែលចូលចិត្តចែករំលែកនូវចំណេះអាជីវកម្មដល់អ្នកដែលមានបំណងចាប់ផ្ដើមធ្វើអាជីវកម្មបាននិយាយនៅក្នុងកម្មវិធីមួយកាលពីពេលថ្មីៗនេះឱ្យដឹងថា ក្នុងនាមជានាយកប្រតិបត្តិក្រុមហ៊ុនមួយរូប នៅពេលដាក់ការងារឬកិច្ចការអ្វីមួយឱ្យបុគ្គលិកធ្វើ លោកមិនចង់លឺបុគ្គលិកបរិយាយច្រើននោះទេ។ អ្វីដែលសំខាន់គឺលទ្ធផលនៅពេលចុងក្រោយ ទោះបីជាបុគ្គលិកនោះ ចង់ធ្វើតាមពិធី ឬផ្លូវមួយណាក៏ដោយ។
លោកបន្តថា នាយកប្រតិបត្តិ ឬថ្នាក់ដឹកនាំក្រុមហ៊ុន មានការងារច្រើនណាស់ដែលត្រូវធ្វើ ដូច្នេះអ្វីដែលគាត់ចង់បានមិនមែនបុគ្គលិកឆ្កឹះបញ្ហាមកឱ្យអ្នកគ្រប់គ្រងនោះទេ គឺរកឱ្យឃើញបញ្ហាហើយយកបញ្ហានោះចេញឱ្យបាន និងធ្វើកិច្ចការដែលបានដាក់ជូនឱ្យសម្រេចបានជាលទ្ធផល។ មួយទៀតដែរ ក្នុងនាមជាម្ចាស់ក្រុមហ៊ុនលោកបានដឹងថា ម្ចាស់ក្រុមហ៊ុនមិនចង់បានបុគ្គលិកដែលមានអំនួត ហើយគិតថា នៅក្នុងក្រុមហ៊ុននោះមានតែខ្លួនទេខ្លាំង បើអត់ពីខ្លួនទៅក្រុមហ៊ុននឹងពិបាក។
លោកថា “ការគិតបែបនេះ គឺខុសទាំងស្រុង ព្រោះថាក្រុមហ៊ុនអាចបណ្ដុះបណ្ដាលយើងឱ្យចេះធ្វើការ និងពូកែបាន ដូច្នេះក្រុមហ៊ុនក៏អាចរកអ្នកថ្មីមកបណ្ដុះបណ្ដាលឱ្យធ្វើការពូកែដូចឬខ្លាំងជាងបុគ្គលិកចាស់ៗទៅទៀត”។
ចំណែកបុគ្គលដែលចាត់ទុកថាជាអ្នកជោគជ័យម្នាក់ទៀតលោកឧកញ៉ាគួច ម៉េងលីកន្លងមកក៏បានមានប្រសាសន៍ថា អ្វីដែលអ្នកចាប់ផ្ដើមអាជីវកម្មត្រូវធ្វើ គឺសិក្សារៀនសូត្រពីគេឱ្យបានច្រើន។ មានម្ចាស់អាជីវកម្មធំៗមួយចំនួនបានចាប់ផ្ដើមចេញពីបុគ្គលិកធម្មតាម្នាក់ប៉ុណ្ណោះ បើទោះបីជាខ្លួនទុនរួចស្រេចក្នុងការបង្កើតក្រុមហ៊ុនឬអាជីវកម្មទៅហើយនោះ។
លោកបន្តទៀត ការចាប់ផ្ដើមចេញពីបុគ្គលិកជាន់ទាបបែបនេះ គ្រាន់តែចង់ដឹងពីបទពិសោធន៍ការងារ និងការលំបាកអ្វីខ្លះពីបុគ្គលិក ដើម្បីអាចដឹងនិងរកដំណោះស្រាយនៅពេលដែលខ្លួនបើកអាជីវកម្មបានសម្រេច៕
