ដោយ: គង់ លាងហួរ
អន្តរជាតិ: ក្រុមហ៊ុន Binance ជាទីផ្សារជួញដូររូបិយប័ណ្ណគ្រីបតូឈានមុខគេរបស់ពិភពលោក ដែលមានតម្លៃមូលធនបត្រទីផ្សាររាប់ពាន់លានដុល្លារអាមេរិក។
លោក Changpeng Zhao និងលោកស្រី Yi He ជាសហស្ថាបនិកដំបូងគេបង្អស់របស់ក្រុមហ៊ុននេះ។
យ៉ាងណាមិញ ភាគហ៊ុនរបស់ក្រុមហ៊ុន Binance មិនត្រូវបានជួញដូរជាសាធារណៈទេ។ ក្រុមហ៊ុនមិនទាន់បោះផ្សាយលក់ មូលបត្រជាសាធារណៈ(IPO)នៅឡើយ ហើយបញ្ហាផ្លូវច្បាប់អាចនឹងពន្យារពេលបន្ថែមទៀត។
ប៉ុន្តែគេនៅតែមានវិធីសាស្ត្រ ដើម្បីទាញយកផលចំណេញពីក្រុមហ៊ុន Binance។
តួយ៉ាង ក្រុមវិនិយោគិនដែលមានការទទួលស្គាល់(Accredited investors) អាចវិនិយោគនៅក្នុងក្រុមហ៊ុនឯកជន រួមទាំងក្រុមហ៊ុន Binance តាមរយៈទីផ្សារ Hiive។
វិនិយោគិន ដែលមានការទទួលស្គាល់ជាបុគ្គល ឬអាជីវកម្ម ដែលត្រូវបានអនុញ្ញាតឱ្យទិញ និងលក់មូលបត្រដែលមិនបានចុះបញ្ជីជាមួយអាជ្ញាធរហិរញ្ញវត្ថុ ដូចជា ភាគហ៊ុននៅក្នុងក្រុមហ៊ុនអាជីវកម្មថ្មី ដែលមិនទាន់បានបោះផ្សាយលក់មូលបត្របំណុលជាសាធារណៈ។
ចំណែក Hiive ជាទីផ្សារ ដែលជួយផ្សារភ្ជាប់ការទាក់ទងរវាងម្ចាស់ភាគហ៊ុន នៃក្រុមហ៊ុនឯកជនជាមួយក្រុមហ៊ុន ដែលមានបំណងលក់ភាគហ៊ុន មុនពេលបោះផ្សាយលក់មូលបត្ររបស់ពួកគេ ទៅកាន់វិនិយោគិនដែលមានការទទួលស្គាល់។
តើក្រុមហ៊ុនក្រុមហ៊ុនBinance នឹងឈានជើងចូលទីផ្សារភាគហ៊ុន តាមរយៈការបោះផ្សាយ លក់មូលបត្រជាសាធារណៈនៅពេលណា?។
ចំពោះសំណួរនេះ គេនៅតែរកចម្លើយមិនទាន់បាននៅឡើយ។ ជាក់ស្ដែងយោងតាមគេហទំព័រ Binance.com បានអះអាងថា ក្រុមហ៊ុននឹងមិនបោះផ្សាយ មូលបត្រលក់មូលបត្រជាសាធារណៈ (IPO) នាពេលណាមួយក្នុងពេលឆាប់ៗនេះនោះទេ។ នេះបើយោងតាមលោក Richard Teng នាយកប្រតិបត្តិថ្មីនៃក្រុមហ៊ុន Binance ។
ក្រោមការដឹកនាំរបស់លោក Teng ក្រុមហ៊ុន Binance កំពុងផ្លាស់ប្តូរពីអាណាចក្រ ដែលដឹកនាំដោយស្ថាបនិក ទៅជាបអាណាចក្រគ្រីបតូ ដែលគ្រប់គ្រងដោយក្រុមប្រឹក្សាភិបាល។
ជាមួយនឹងចក្ខុវិស័យរយៈពេលវែង លោកTeng កំពុងពង្រឹងការប្តេជ្ញាចិត្ត មិនឱ្យក្រុមហ៊ុន Binance ឈានជើងចូលផ្សារហ៊ុនសាធារណៈ។
លើសពីនេះ លោកTeng បានច្រានចោលពាក្យចចាមអារ៉ាមដែលថា ក្រុមហ៊ុនBinance គ្រោងបោះផ្សាយលក់ IPO។ លោកសង្កត់ធ្ងន់ថា “Binance មានភាពរឹងមាំផ្នែកហិរញ្ញវត្ថុ ហើយយើងមិនត្រូវការការ រៃអង្គាសថវិកាសាធារណៈនោះទេ”។
ជាមួយគ្នានេះ ក្រុមហ៊ុន Binance កំពុងចាក់បញ្ចូលធនធានបន្ថែមទៀត ក្នុងការអនុលោមតាមច្បាប់ របស់ប្រទេសផ្សេងៗ ដើម្បីបំពេញតាមតម្រូវការ បទប្បញ្ញត្តិជាជាងការបោះផ្សាយលក់មូលបត្របំណុល។
ទោះបីជាលោក Changpeng Zhao ចុះចេញពីតំណែងយ៉ាងណាក្តី ក៏ក្រុមហ៊ុនBinance កំពុងបន្តពង្រីកការបោះជំហានជាសកលរបស់ខ្លួន ព្រមទាំងស្វែងរកអាជ្ញាប័ណ្ណ និងដោះស្រាយបញ្ហាប្រឈមផ្នែកច្បាប់ នៅក្នុងទីផ្សារនានា ដូចជា ទីក្រុងឌូបៃ ប្រទេសឥណ្ឌា និងប្រទេសប្រេស៊ីល៕ប្រភព: Binance.com៕
