រដ្ឋាភិបាលចិនចាប់ផ្ដើមសាងសង់កន្លែងបាញ់បង្ហោះយានអវកាសពាណិជ្ជកម្មដំបូងបង្អស់របស់ខ្លួន

ដោយៈ សុខុម

ប្រទេសចិន: នៅរយៈពេលជាង១ទសវត្សរ៍ចុងក្រោយនេះ មហាយក្សចិន បានខិតខំប្រឹងប្រែងយ៉ាងខ្លាំង នៅក្នុងការប្រកួតប្រជែងជាមួយបណ្ដាមហាអំណាចធំៗ របស់ពិភពលោកដូចជារុស្ស៊ី អង់គ្លេស ជាដើម និងជាពិសេសសហរដ្ឋអាមេរិក លើគ្រប់វិស័យ រួមទាំងអវកាសផងដែរ។

ដើម្បីសម្រេចមហិច្ឆតាដ៏ធំរបស់ខ្លួនផ្នែកអវកាស ប្រទេសចិនបានចាប់ផ្ដើមដំណើរការសាងសង់កន្លែង បាញ់បង្ហោះយានអវកាសពាណិជ្ជកម្មដំបូងបង្អស់របស់ខ្លួនកាលពីថ្ងៃពុធ ទី៦ ខែកក្កដា នៅទីក្រុងវិនឆាង (Wenchang) ខេត្តកោះហៃណាន (Hainan) ភាគខាងត្បូងប្រទេសចិន។

ដោយសារខេត្តហឺណាន មានគម្រោងកំពង់ផែពាណិជ្ជកម្មសេរីដ៏ធំដែលកំពុងសាងសង់ កន្លែងបាញ់បង្ហោះយានអវកាសពាណិជ្ជកម្ម ក្នុងខេត្តនេះ នឹងក្លាយជាកន្លែងបាញ់បង្ហោះ យានលំដាប់ថ្នាក់ពិភពលោក តម្រង់ទិសទីផ្សារ និងធ្វើឱ្យកាន់តែប្រសើរឡើងបន្ថែមទៀត នូវសមត្ថភាពបាញ់បង្ហោះយានរ៉ុក្កែត ដឹកជញ្ជូនពាណិជ្ជកម្មរបស់ប្រទេសចិន។

ចុចទីនេះដើម្បី Subscribe Telegram Channel «Cambodia Financial Times» សម្រាប់ទទួលបានព័ត៌មានថ្មីៗ

លោក ហ្វឹង ហ្វ៊ី (Feng Fei) អភិបាលខេត្តហឺណានបានថ្លែងថា ខេត្តនេះ នឹងទាញយកសក្ដានុពលពេញលេញ​ ពីគម្រោងសាងសង់កន្លែងបាញ់បង្ហោះយាននេះ និងគោលនយោបាយផែពាណិជ្ជកម្មសេរី ដោយខិតខំប្រឹងប្រែងកសាងទីក្រុងវិនឆាង ឱ្យក្លាយទោជាទីក្រុងអវកាសអន្តរជាតិ លំដាប់កំពូល។

ទោះជាយ៉ាងណា គ្មានការបញ្ជាក់ថា តើគម្រោងនេះមានទំហំប៉ុនណា ចំណាយទុនវិនិយោគអស់ប៉ុន្មាន និងត្រូវចំណាយពេលយូរប៉ុនណាទើបសាងសង់បញ្ចប់ជាស្ថាពរនោះឡើយ៕ Xinhua៕

LEAVE A REPLY

Please enter your comment!
Please enter your name here