ខេត្តតំបន់ឆ្នេរ និងខេត្តភាគពាយព្យចំនួន៦ នៅតែជាគោលដៅទេសចរណ៍ពេញនិយមបំផុត នាចុងសប្តាហ៍កន្លងមក

ដោយ៖ សុផារី

ភ្នំពេញ៖ ខេត្តតំបន់ឆ្នេរនៃខេត្តព្រះសីហនុ កែប និងកំពត រួមជាមួយគោលដៅទេសចរណ៍នៅភាគពាយព្យនៃខេត្តសៀមរាប បាត់ដំបង និងពោធិ៍សាត់ គឺជាគោលដៅពេញនិយមសម្រាប់ភ្ញៀវទេសចរនាចុងសប្តាហ៍កន្លងមក។

លោក ថោង ខុន រដ្ឋមន្ត្រីក្រសួងទេសចរណ៍ បានឱ្យដឹងនៅថ្ងៃទី០៩ ខែឧសភានេះថា នាចុងសប្តាហ៍ ថ្ងៃទី៧-៨ ខែឧសភា ឆ្នាំ២០២២ គោលដៅទេសចរណ៍សំខាន់ៗ រួមមាន ខេត្តតំបន់ឆ្នេរចំនួន៣ខេត្ត រួមមាន ខេត្តព្រះសីហនុ ទទួលបានភ្ញៀវទេសចរចំនួន ៦១.០២០នាក់ ខេត្តកំពត ៣០.៧០៥ នាក់ និងខេត្តកែប ២៩.៥០៩នាក់។

ចុចទីនេះដើម្បី Subscribe Telegram Channel «Cambodia Financial Times» សម្រាប់ទទួលបានព័ត៌មានថ្មីៗ

ចំណែក គោលដៅភាគពាយព្យនៃប្រទេស ដែលទទួលបានការពេញនិយមផងដែរនោះ រួមមាន ខេត្តបាត់ដំបង៣៤.៧៩០នាក់ ខេត្តសៀមរាប១៨.៦៩៦នាក់ និងខេត្តពោធិ៍សាត់១៥.១១១នាក់។

បើតាមទិន្នន័យក្រសួងទេសចរណ៍ដដែល នៅទូទាំងប្រទេសទទួលបានភ្ញៀវទេសចរសរុបមានចំនួន២៩៩.៨៨៨នាក់ ក្នុងនោះមានភ្ញៀវជាតិចំនួន២៨៣.៩៩០នាក់ និងភ្ញៀវបរទេសផ្ទៃក្នុង១៥.៨៩៨នាក់។

លោករដ្ឋមន្ត្រី ថោង ខុន បានបន្តថា នេះជាសប្តាហ៍ទី៣ជាប់គ្នាបន្ទាប់ពីពិធីបុណ្យចូលឆ្នាំប្រពៃណីជាតិ ដែលចរន្តភ្ញៀវទេសចរផ្ទៃក្នុងមានចំនួនប្រមាណ៣០ម៉ឺននាក់ ខណៈដែលមុនពិធីបុណ្យចូលឆ្នាំ ចរន្តភ្ញៀវជាមធ្យមក្នុងចន្លោះ២០-២៥ម៉ឺននាក់៕

LEAVE A REPLY

Please enter your comment!
Please enter your name here