ដោយ: សហសេវិក
អន្តរជាតិ: ប្រទេសអេស្ប៉ាញ និងព័រទុយហ្គាល់កំពុងយកចិត្តទុកដាក់កាន់តែខ្លាំងឡើងចំពោះទីផ្សារលំនៅដ្ឋានដែលកំពុងរីកចម្រើនយ៉ាងឆាប់រហ័ស ខណៈតម្លៃអចលនទ្រព្យនៅតែបន្តកើនឡើង។
ទោះជាយ៉ាងណា ក្រុមនិយតករជឿជាក់ថាស្ថានភាពនេះនឹងមិនឈានចូលដល់វិបត្តិពពុះលំនៅឋាននោះទេ។
មិនដូចប្រទេសជាច្រើននៅក្នុងតំបន់ចាយប្រាក់អឺរ៉ូទេ ប្រទេសទាំងពីរកំពុងជួបប្រទះនឹងការរីកចម្រើនផ្នែកអចលនទ្រព្យ ដោយសារតម្រូវការរឹងមាំ និងការផ្គត់ផ្គង់លំនៅដ្ឋានមានកម្រិត។
នៅក្នុងត្រីមាស១ តម្លៃផ្ទះនៅក្នុងប្រទេសអេស្ប៉ាញបានកើនឡើង១២,៩ភាគរយ ខណៈតម្លៃផ្ទះនៅក្នុងប្រទេសព័រទុយហ្គាល់បានកើនឡើង១៧,៨ភាគរយ ដែលជាកំណើនខ្ពស់បំផុតនៅក្នុងសហភាពអឺរ៉ុប។
ការផ្តល់ប្រាក់កម្ចីទិញផ្ទះក៏កំពុងកើនឡើងផងដែរ។ ធនាគារធំៗនៅប្រទេសអេស្ប៉ាញដូចជា Santander និង BBVA កំពុងប្រកួតប្រជែងយ៉ាងខ្លាំងដើម្បីផ្តល់ប្រាក់កម្ចីទិញផ្ទះ។
កំណើននៃការចំណាយរបស់អ្នកប្រើប្រាស់ និងចំនួនជនអន្តោប្រវេសន៍បានជួយធ្វើឱ្យប្រទេសអេស្ប៉ាញក្លាយជាប្រទេសមួយដែលមានសេដ្ឋកិច្ចរីកចម្រើនលឿនបំផុតនៅក្នុងតំបន់ប្រើប្រាស់ប្រាក់អឺរ៉ូ។ ការផ្តល់ប្រាក់កម្ចីទិញផ្ទះបានកើនឡើងដល់ ៤៩៦ ពាន់លានអឺរ៉ូនៅក្នុងត្រីមាសទីមួយ ដែលជាកម្រិតខ្ពស់បំផុតចាប់តាំងពីឆ្នាំ ២០១៨។
នៅប្រទេសព័រទុយហ្គាល់ ការផ្តល់ប្រាក់កម្ចីទិញផ្ទះបានកើនឡើងជាង ១០ភាគរយនៅក្នុងត្រីមាសទី១ ដែលជាល្បឿនលឿនបំផុតក្នុងរយៈពេលជាង ២០ ឆ្នាំ៕ប្រភព: Reuters៕
