គ្រឹះស្ថានហិរញ្ញវត្ថុមិនមែនធនាគារផ្ដល់ឥណទានទៅកាន់អតិថិជនជិត ២លាននាក់មានទឹកប្រាក់ជាង ៨,៣ពាន់លានដុល្លារ

ដោយ៖ លក្ខិណា

ភ្នំពេញ ៖ ក្នុងឆ្នាំ២០២២នេះការផ្ដល់ឥណទានពីគ្រឹះស្ថានធនាគារនិងមីក្រូហិរញ្ញវត្ថុ ក៏ដូចជាបណ្ដាគ្រឹះស្ថានហិរញ្ញវត្ថុផ្សេងទៀត នៅតែរក្សាបាននូវកំណើនល្អប្រសើរទៅលើអាជីវកម្មអាទិភាព សម្រាប់ជំរុញ និងស្ដារសេដ្ឋកិច្ចក្រោយវិបត្តិឡើងវិញ។

យោងតាមរបាយការណ៍របស់សមាគមមីក្រូហិរញ្ញវត្ថុកម្ពុជា បានឱ្យដឹងថា គិតត្រឹមដំណាច់ត្រីមាសទី១ឆ្នាំ២០២២ គ្រឹះស្ថានមីក្រូហិរញ្ញវត្ថុ ក្រុមហ៊ុនភតិសន្យាហិរញ្ញវត្ថុ និងគ្រឹះស្ថានឥណទានជនបទ ដែលជាសមាជិករបស់សមាគម បន្តប្រកាន់ខ្ជាប់នូវទស្សនៈវិស័យរបស់ខ្លួន តាមរយៈការជួយឱ្យប្រជាជនកម្ពុជា ចំនួនជិត២លាននាក់ ទទួលបានឥណទានសរុប ជាង៨.៣៥៥លានដុល្លារ ខណៈអតិថិជនបញ្ញើសរុបមានចំនួនជិត២,៧លាននាក់ បានដាក់ប្រាក់បញ្ញើសរុបជាង៤.៤០៣លានដុល្លារ។

របាយការណ៍ដដែលឱ្យដឹងថា តាមរយៈការិយាល័យតំណាងចំនួនប្រមាណ១.៩៤៥ កន្លែង និងមានបុគ្គលិកបម្រើការងារសរុបប្រមាណ២៩.៤២៥ នាក់ នៅទូទាំង២៥ រាជធានី-ខេត្ត នៃកម្ពុជា។ ទិន្នន័យនេះមិនបានរាប់បញ្ចូលទិន្នន័យពីធនាគារទាំង៥ ដែលជាសមាជិកនោះទេ ។

ថ្មីៗនេះដែរ ធនាគារសហគ្រាសធុនតូច និងមធ្យមកម្ពុជា ក៏បានបញ្ចេញថវិកាប្រមាណ១៥០លានដុល្លារអាមេរិក សម្រាប់ផ្ដល់ឥណទានជូនសហគ្រិន ក្នុងវិស័យទេសចរណ៍ ដើម្បីស្ដារ និងជំរុញវិស័យនេះឱ្យមានកំណើនឡើងវិញ ដោយ៧៥លានដុល្លារជាថវិកាបដិភាគរបស់រដ្ឋាភិបាល និង៧៥លានដុល្លារអាមេរិកជាថវិកាពីធនាគារ និងគ្រឹះស្ថានមីក្រូហិរញ្ញវត្ថុក្នុងស្រុក ។

ចុចទីនេះដើម្បី Subscribe Telegram Channel «Cambodia Financial Times» សម្រាប់ទទួលបានព័ត៌មានថ្មីៗ

តាមរយៈថវិកានេះនឹងជំរុញឱ្យឥណទាន នៅក្នុងវិស័យធនាគារ និងមីក្រូហិរញ្ញវត្ថុនឹងមានកំណើនបន្ថែមទៀត ធ្វើយ៉ាងណាផ្ដល់ឱកាសដល់ម្ចាស់អាជីវកម្មពង្រីក និងពង្រឹងអាជីវកម្មរបស់ខ្លួនក្រោយពីទទួលរងផលប៉ះពាល់អស់រយៈពេលជាង២ឆ្នាំកន្លងទៅនេះ ៕

LEAVE A REPLY

Please enter your comment!
Please enter your name here