រដ្ឋាភិបាលចិនដាក់សម្ពាធឱ្យធនាគារនានាជួយគាំទ្របណ្ដាក្រុមហ៊ុនអភិវឌ្ឍន៍អចលនទ្រព្យដែលខ្វះលុយ

ដោយៈឧត្តម

ប្រទេសចិនៈ បណ្ដាធនាគារចិន កំពុងទទួលរងសម្ពាធកាន់តែខ្លាំងឡើងឱ្យជួយគាំទ្រ ដល់បណ្ដាក្រុមហ៊ុនអភិវឌ្ឍន៍អចលនទ្រព្យ ដែលមានវិបត្តិសាច់ប្រាក់ បន្ទាប់ពីការអំពាវនាវរបស់ក្រុមនិយ័តករ ជាច្រើនខែមកនេះគ្មានប្រសិទ្ធភាព ក្នុងជំរុញការផ្តល់ប្រាក់កម្ចីដល់វិស័យអចលនទ្រព្យ។

ប្រភពច្បាស់ការបានទម្លាយឱ្យដឹងថា បណ្ដាសាខាធនាគារប្រជាជនចិន (PBOC) ដែលជាធនាគារកណ្ដាល បានកោះប្រជុំជាមួយធនាគារក្នុងទីក្រុងជាច្រើន ចាប់តាំងពីសប្តាហ៍មុន ដើម្បីសិក្សាវាយតម្លៃថា តើហេតុអ្វីបានជាការផ្ដល់ប្រាក់កម្ចីមានការយឺតយ៉ាវ ក៏ដូចជាការលំបាកដែលធនា​គារប្រឈម និងវិធីដែលនិយ័តករ អាចជួយបានពួកគេបានផងដែរ។ នេះបើយោងតាមសារព័ត៌មាន The Edge Markets ចុះផ្សាយកាលពីថ្ងៃព្រហស្បតិ៍ ទី២ ខែមិថុនា។

ដោយសុំមិនបញ្ចេញអត្តសញ្ញាណ ប្រភពដដែលទម្លាយឱ្យដឹងទៀតថា ចំណាត់ការនេះឆ្លុះបញ្ចាំងឱ្យឃើញថា ក្រុមមន្ត្រីចិនមានការព្រួយបារម្ភកាន់តែខ្លាំងឡើង បន្ទាប់ពីក្រុមនិយ័តករ បានចេញសេចក្ដីណែនាំម្ដងហើយម្ដងទៀត ជំរុញឱ្យបណ្ដាធនាគារជួយពន្លឿន ការផ្ដល់កម្ចីអចលនទ្រព្យក្នុងរយៈពេលជាច្រើនខែមកនេះ។

បណ្ដាក្រុមហ៊ុនសាងសង់ និងក្រុមនិយ័តករកំពុងពឹងផ្អែក លើធនាគារដើម្បីផ្តល់ការរស់រានដល់វិស័យអចលនទ្រព្យ ខណៈហិរញ្ញប្បទានមូលបត្របំណុលរីងស្ងួត ហើយការលក់ផ្ទះក៏ស្ងាត់ដូចចោរលួចសេះ។

ចុចទីនេះដើម្បី Subscribe Telegram Channel «Cambodia Financial Times» សម្រាប់ទទួលបានព័ត៌មានថ្មីៗ

រំហូរសាច់ប្រាក់របស់បណ្ដាក្រុមហ៊ុន អភិវឌ្ឍន៍ដែលបានពីប្រាក់កម្ចីធនាគារ បានធ្លាក់ចុះជិត៣០%​ ក្នុងរយៈពេលប៉ុន្មានខែចុងក្រោយនេះ ដែលបានជះផលប៉ះពាល់ ដល់កិច្ចខិតខំប្រឹងប្រែង របស់ប្រធានាធិបតីចិន លោក ស៊ី ជីនភីង ដើម្បីទប់ការកាំក្បាលចុះនៃវិស័យអចលនទ្រព្យ។

ខណៈចំនួនក្រុមហ៊ុនអភិវឌ្ឍន៍ ដែលបានខកខានទូទាត់ ឬពន្យារពេលទូទាត់បំណុលចេះតែកើនឡើង ធនាគារនានាមានការស្ទាក់ស្ទើរក្នុងការបង្កើនការផ្ដល់កម្ចីដល់វិស័យនេះ ទៅតាមការទាមទាររបស់ក្រុមនិយ័តករ៕ The Edge Markets៕

LEAVE A REPLY

Please enter your comment!
Please enter your name here